«КУМТӨР ОПЕРЕЙТИНГ КОМПАНИНИН» 100 ПАЙЫЗ АКЦИЯСЫ «КУМТӨР ГОЛД КОМПАНИГЕ» ӨТКӨРҮЛДҮ

Жарыяланган: 25 May 2026

«Кумтөр Оперейтинг Компани» жабык акционердик коомунун 100 пайыз акциясы «Кумтөр Голд Компани» жабык акционердик коомуна өткөрүлдү.

Тийиштүү чечим учурда Тоголок алтын кенин өздөштүрүү жана Жангарт аянтында геологиялык чалгындоо иштерин жүргүзүп жаткан «Кумтөр Оперейтинг Компанинин» маселелери боюнча «Кумтөр Голд Компаниге» ыкчам чечимдерди кабыл алуу мүмкүнчүлүгүн берүү максатында кабыл алынды.

Белгилей кетсек, буга чейин «Кумтөр Оперейтинг Компани» жабык акционердик коомунун жалгыз акционери «Кыргызалтын» ачык акционердик коому болгон.

Маалымат үчүн: Тоголок алтын кени 1978-жылы ачылып, Ысык-Көл облусунун Жети-Өгүз районунун жолу катаал бийик тоолуу аймагында жайгашкан.

Тоголок кенине эң жакын калктуу конуштар – Ак-Шыйрак жана Үч-Кошкон кыштактары. Бишкек шаарынан Тоголок кенине чейинки аралык 560 чакырымды түзөт.

Учурда Тоголок кенинде толук кандуу тоо-кен иштери башталып, биринчи рудалар 2026-жылы казылып алынат. Муну менен катар, «Кумтөр Оперейтинг Компани» келечектүү Жангарт аянтында да геологиялык чалгындоо жана бургулоо иштерин жүргүзүүдө.

Тоголок кенин өздөштүрүү 10-15 жылга эсептелген жана ал эки этап менен ишке ашырылат. Кыргыз Республикасынын Пайдалуу кендеринин мамлекеттик запасы боюнча комиссиясында 19 928,5 кг алтындын запасы бекитилген.